Gedicht: De Rucksack
von Annita M. Rosenthal
Heb nur dein Rucksack wirrer uff!
Es dooren doch kaan annen draa,
dann jeder dräd on seim genuch
un ess domed aach meisd ellaa.
Ein jeder Mensch uff dere Weld,
der hod sei Lasd un aach sein Brasd,
un wann em doas aach näid gefälld:
Es gebd kaa Rouh un selden Rasd!
Unsen Rucksack ess vollgepackd
med Ärjer, Laad un Soaje,
doas alles hun me engesackd
un haales meisd veboaje.
Un härre me näid oab un zou
die Läib un aach die Frehlischkeid,
es wär näid goud im uns bestelld
en dere kurze Erdenzeid.
Ierschd ganz seletzd, om Enn vom Wäg,
wus dann nemmieh weirer giehd,
doo stelle me de Rucksack hie,
dann es Reckkreuz dood uns wieh.
Doch wäi mess aach bedroachde will,
aa Erkenndnis bleibd uns dann:
"Em jedem Rucksack ess nur su vill,
doass men groad noch schlebbe kann!" |
